Azhar Inayati
shuru-e-ishq men logon ne itni shiddat ki
ki rafta rafta kami ho ga.i mohabbat ki
ye kargah-e-zehanat hai is men chhoTe kya
baḌe-baḌon ne yahan par baḌi himaqat ki
jahan se ilm ka ham ko ghurur hota hai
vahin se hoti hai bas ibtida jahalat ki
jo aadmi hai talash-e-sakun men sadiyon se
usi ne kar di yahan intiha bhi vahshat ki
purane logon ko har daur men raha shikva
na.e dimaghon ne har ahd men baghavat ki
dikha.i deta nahin apna mom ho jaana
shikayaten hain hamen dhuup se tamazat ki
isi liye to andhere men aaj baiThe hain
ki ham ne apne charaghon ki kab hifazat ki
Leave a Reply