gham ko vaj.h-e-hayat kahte hain
aap bhi ḳhuub baat kahte hain
aap se hai vo ya hamin se hai
ham jise ka.enat kahte hain
kor-zauqi ki intiha ye hai
log din ko bhi raat kahte hain
ye ghalat kya hai tajarbe ko agar
hasil-e-hadsat kahte hain
bach nikalna fareb-e-hasti se
bas isi ko najat kahte hain
jis mohabbat pe hai madar-e-hayat
us ko bhi be-sabat kahte hain
vo mire sher hi to hain ‘sho.ala’
jin ko qand-o-nabat kahte hain
Leave a Reply