yuun boli thi chiḌiya ḳhali kamre men
jaise koi nahin tha ḳhali kamre men
har pal mera rasta dekha karta hai
jaane kis ka saaya ḳhali kamre men
khiḌki ke raste se laaya karta huun
main bahar ki duniya ḳhali kamre men
har mausam men aate jaate rahte hain
log hava aur dariya ḳhali kamre men
chehron ke jangal se le kar aaya huun
surḳh gulab ka pauda ḳhali kamre men
basti men har raat nikalne vaala chand
umr hui na utra ḳhali kamre men
tez hava men saare kuuze TuuT ga.e
aur phaila ik sahra ḳhali kamre men
‘sahil’ shahr se duur akela rahta hai
jaise main huun rahta ḳhali kamre men
Leave a Reply