kisa-e-gul men band thi ḳhushbu
kis qadar ḳhud-pasand thi ḳhushbu
sar-nigun tha ghurur-e-ghuncha-o-gul
sar-ba-sar sar-buland thi ḳhushbu
ahl-e-gulshan the mahv-e-ramish-o-rang
haan magar fikrmand thi ḳhushbu
uḌ ga.i amad-e-ḳhizan se qabl
vaqa.i aql-mand thi ḳhushbu
an-e-vahid men aa ke lauT ga.i
ahuon ki zaqand thi ḳhushbu
daftar-e-gulsitan tha tulani
aur bas harf-e-chand thi ḳhushbu
mujib-e-ishq thi magar ‘fartash’
agahi thi na pand thi ḳhushbu
Leave a Reply