Junun Kam Justuju Kam Tishnagi Kam

junun kam justuju kam tishnagi kam

nazar aae na kyuun dariya bhi shabnam

ba-hamd-o-lillah tu hai jis ka hamdam

kahan us qalb men gunjaish-e-gham

tavajjoh be-nihayat aur nazar kam

khusha ye iltifat-e-husn-e-barham

miri ankhon ne dekha hai vo aalam

ki har aalam hai laghzish-ha-e-paiham

khata kyunkar na hoti afiyat-soz

ki jannat hi na thi meraj-e-adam

khusha ye nisbat-e-husn-o-mohabbat

jahan baithe nazar aae hamin ham

vo ik husn-e-sarapa allah allah

ki jis ki har ada aalam hi aalam

kahan pahlu-e-khurshid-e-jahan-tab

kahan ik naznin doshiza shabnam

masarrat zindagi ka dusra naam

masarrat ki tamanna mustaqil gham

Leave a Comment