Anwar Anjum
tu chand hai to chand-nagar mujh se chhin le
main kya karunga ḳhak-basar mujh se chhin le
ab teri be-ruḳhi ka bhi aata hai yuun ḳhayal
jaise koi mata-e-digar mujh se chhin le
tu ḳhud hi apni tarz-e-sitam par nigah rakh
main kya kahun ye dard-e-jigar mujh se chhin le
Daste rahenge zehn ko kab tak mushahidat
yarab ye imtiyaz-e-nazar mujh se chhin le
pahchanti nahin hai use jab kisi ki aankh
be-kar hai nishan-e-hunar mujh se chhin le
ru-e-sahar tu ḳhair mujhe kya dikha.ega
tu arzu-e-did-e-sahar mujh se chhin le
Leave a Reply