mil gae par hijab baaqi hai
fikr-e-naz-o-itab baaqi hai
baat sab thik-thak hai pa abhi
kuchh saval-o-javab baaqi hai
garche maajun kha chuke lekin
daur-e-jam-e-sharab baaqi hai
jhute vaade se un ke yaan ab tak
shikva-e-be-hisab baaqi hai
gaah kahte hain shaam huui abhi
zarra-e-aftab baaqi hai
phir kabhi ye ki abr men kuchh-kuchh
partav-e-mahtab baaqi hai
hai kabhi ye ki tujh pe chhidkenge
jo lagan men shahab baaqi hai
aur bhadke hai ishtiyaq ki aag
ab kise sabr-o-tab baaqi hai
ud gai niind aankh se kis ki
lazzat-e-khurd-o-khvab baaqi hai
hai khushi sab tarah kii, nahaq ka
khatra-e-inqalab baaqi hai
hai vo dil ki dhadak so juun ki tuun
ji par us ka azaab baaqi hai
jo bhara shisha tha hua khali
par vo bu-e-gulab baaqi hai
apni ummid thi so bar aai
yaas shakl-e-sarab baaqi hai
hai yahi dol jab tak ankhon men
dam basan-e-habab baaqi hai
misl-e-farmuda-e-huzur ‘insha’
phir vahi iztirab baaqi hai
Leave a Reply