bahadur-shah-zafar

Pan Ki Surkhi Nahin Lab Par But-E-Khun-Khwar Ke

paan ki surkhi nahin lab par but-e-khun-khvar ke

lag gaya hai khun-e-ashiq munh ko is talvar ke

khal-e-ariz dekh lo halqe men zulf-e-yar ke

mar-e-mohra gar na dekha ho dahan men maar ke

anjum-e-taban falak par janti hai jis ko khalq

kuchh sharare hain vo meri ah-e-atish-bar ke

tuba-e-jannat se us ko kaam kya hai hur-vash

jo ki hain asuda saae men tiri divar ke

puchhte ho haal kya mera qimar-e-ishq men

jhaad baitha haath main naqd-e-dil-o-din haar ke

ye hui tasir ishq-e-koh-kan se sang-e-ab

ashk jaari ab talak chashmon se hain kohsar ke

hai vo be-vahdat ki jo samjhe hai kufr o diin men farq

rakhti hai tasbih rishta taar se zunnar ke

vada-e-didar jo thahra qayamat par to yaan

roz hoti hai qayamat shauq men didar ke

hoshiyari hai yahi kiije ‘zafar’ is se hazar

dekhiye jis ko nashe men bada-e-pindar ke

More Poems

Leave a Comment