subu utha mire saaqi ki raat jaati hai
nazar mila mire saaqi ki raat jaati hai
ki tu manae mujhe is liye main rutha huun
mujhe mana mire saaqi ki raat jaati hai
hai meri jaan miri jaan tire tabassum men
tu muskura mire saaqi ki raat jaati hai
shab-e-visal ki khushbu faza ki rangini
kahin se la mire saaqi ki raat jaati hai
kisi bahar ka naghma koi suhani ghazal
tu gunguna mire saaqi ki raat jaati hai
phir ik fareb men ye shab guzar na jaae kahin
qasam na kha mire saaqi ki raat jaati hai
qarib ho ke bhi ‘azim’ ke tu qarib nahin
palat ke aa mire saaqi ki raat jaati hai
Leave a Reply