Yusuf Zafar
ham garche dil o jaan se bezar hue hain
ḳhush hain ki tire gham ke saza-var hue hain
uTThe hain tire dar se agar surat-e-divar
ruḳhsat bhi to juun saya-e-divar hue hain
kya kahiye nazar aati hai kyuun ḳhvab ye duniya
kya janiye kis ḳhvab se bedar hue hain
ankhon men tire jalve liye phirte hain ham log
ham log ki rusva sar-e-bazar hue hain
kuchh dekh ke piite hain lahu ahl-e-tamanna
mai-ḳhvar kisi baat pe mai-ḳhvar hue hain
zanjir-e-havadis ki hai jhankar bahar-gam
kya jurm kiya tha ki giraftar hue hain
iz.har-e-gham-e-zist karen kya ki ‘zafar’ ham
vo gham hain ki sharminda-e-iz.har hue hain
Leave a Reply