Humaira Rahat
dariche men khadi barish ko
sadkon par baraste dekhti huun
sochti huun
dukh ko apne naam kya duun main
tamannaon ko girvi rakh ke
khvabon ke sabhi dar-band kar ke
kitni mushkil se
chhuda kar apna daman
chhat aur angan ki tamanna se
faqat ik ghar ki khvahish men
ye zindan mol le kar
is pe apne naam ki takhti lagai hai
bas ik khvahish hai jo
savan-ruton men
dil bahut be chain rakhti hai
ki main savan ki
thandi narm bauchharon ka
resham lams
apne tan badan par odh leti
hai magar kuchh yuun
main barish dekh to sakti huun
is ko chhu nahin sakti
Leave a Reply