hain ahl-e-chaman hairan ye kaisi bahar aai
hain phuul khile lekin hai rang na raanai
un ke rukh-e-rangin se is saad-e-simin se
phulon ne phaban paai suraj ne ziya paai
sab mai-kade viran hain sunsan gulistan hain
kahne ko ghata chhai kahne ko bahar aai
madhoshi-o-masti ka andaz nirala hai
mai rindon ne pi kam hi paimanon se chhalkai
tanhai men rah kar bhi tanha nahin hote ham
tanhai men yadon ki jab chalti hai purvai
is daur men jiina bhi kuchh kam nahin marne se
na-karda gunahon ki jaise ho saza paai
hanste hue marne ko tayyar jo rahte hain
aise hi jiyalon ne jiine ki ada paai
is daur ke insan ka andaz nirala hai
apne ko adu samjhen ghairon se shanasai
Leave a Reply