Ab Yahi Behtar Hai Naqsh-E-Ab Hone De Mujhe

ab yahi behtar hai naqsh-e-ab hone de mujhe

yunhi rusva ḳhatir-e-ahbab hone de mujhe

niind a.ankhon men parindon ki tarah utri hai aaj

ai nafas ahista chal gharqab hone de mujhe

ek TukḌa abr ka phirta hai manind-e-ghazal

ai miri chashm-e-havas sairab hone de mujhe

umr bhar men ek kaam aisa to kar shauq-e-junun

main agar dariya huun to be-ab hone de mujhe

main bhi patthar ban ke zer-e-ab so ja.un kahin

kab hua aisa ki ab girdab hone de mujhe

mehrban jangal ke saa.e tu hi de apni panah

ḳhvab a.ankhon men hain mahv-e-ḳhvab hone de mujhe

pyaas kahti hai ki chal dariya uTha laa.en yahin

dard kahta hai ki ruk payab hone de mujhe