Nawaz Asimi
junun pe chhoḌ di ab saari zindagi main ne
ḳhirad ko aag laga di abhi abhi main ne
faqir-e-shahr ke shajre ko dekhne ke ba.ad
amir-e-shahr ki dastar khinch li main ne
hava.en itni ḳhunuk thiin ke ḳhuun jamne laga
to tapte sehra ki kuchh ret oḌh li main ne
tilism TuuTa parinde se shahzadi bani
jo sar men kiil Thuki thi nikal di main ne
guzarishon ko na maano magar ye yaad rakho
ka.i suna.e hain farman-e-tughlaqi main ne
buni ga.i thi jo ḳhvahish ke tane-bane se
mazar-e-dil se vo chadar utaar di main ne
mire charaghon vasiyyat to dekh lo meri
tumhare hisse men likh di hai raushni main ne
‘navaz’ is liye rahta hai vo ḳhafa mujh se
ke us ki baat pe haami nahin bhari main ne
Leave a Reply