Har Tamanna Dil Se Rukhsat Ho Gai

”har tamanna dil se rukhsat ho gai”

lijiye fursat hi fursat ho gai

kaun samjhae dar-o-divar ko

jin ko tere diid ki lat ho gai

ham nahin ab barishon ke muntazir

ab hamen sahra ki aadat ho gai

sarhadon ki bastiyon sa dil hua

vahshaton ki jin ko aadat ho gai

sahilon par kya gharondon ka vajud

tutna hi in ki qismat ho gai

rahaton ki bhi talab baaqi nahin

dard se aise mohabbat ho gai

Leave a Comment