Uski Talab Mein Rah Ko Takti Hai Zindagi

us ki talab men raah ko takti hai zindagi

ankhon men vaqt-e-sham chamakti hai zindagi

tere liye jab aankh barasti hai raat ko

phir dil ke saath saath sulagti hai zindagi

dukh se niDhal ho ke jo roti hain betiyan

phir un ke dekh dekh ke hansti hai zindagi

jo ik khayal bais-e-azar hai bahut

us ik khayal se hi chahakti hai zindagi

kis se karen ye baat ki jo haal hain yahan

khamosh agar hue to bilakti hai zindagi

raston ko soch soch pareshan hain sabhi

manzil ko khoj khoj sisakti hai zindagi

chahat ke jo bhi zakhm hain rakhiye sambhal kar

in ki hi baas se to mahakti hai zindagi

us ne diya tha ek diya raah ke liye

kab tak jalega aaj to thakti hai zindagi

Leave a Comment