taḳhta-e-mashq banun jan-ba-sipar ho ja.un
tu bata kaun sa chehra luun kidhar ho ja.un
be-zabanon ki rifaqat bhi mayassar kar li
boliye aap ka manzur-e-nazar ho ja.un
raah takte hue ankhen to adhuri Thahrin
kahiye sarkar ki ab rahguzar ho ja.un
meri avaz se himmat ko jila milti hai
be-kasi TuuT paḌe main ki jidhar ho ja.un
ḳhair Thahri hai zamane ke muafiq hona
hone ko ji nahin chahe hai magar ho ja.un
jo baghavat pe va.i.don se nikhar jaata hai
‘farhat’-e-talḳh-nava tesha-nazar ho ja.un
Leave a Reply