ab chhoḌ bhi do yaar badan TuuT raha hai
banhon men giraftar badan TuuT raha hai
is kibr se kab kis ko sukun aaya mayassar
mast-e-mai-e-pindar badan TuuT raha hai
daman jo hua chaak to kuchh gham nahin lekin
ai husn ki sarkar badan TuuT raha hai
har roz patangon se charaghon ne kaha ye
mil kar na karo vaar badan TuuT raha hai
barson se mira jism dil-o-jan-o-jigar se
hai bar-sar-e-paikar badan TuuT raha hai
roTi ke liye roz thakan saath huun laata
ab mat karo singar badan TuuT raha hai
miTTi ke khilaunon ko uTha.e hue buḌhiya
DhunDhe hai ḳharidar badan TuuT raha hai
inkar zabani tha koi jang nahin thi
phir kyon mira be-kar badan TuuT raha hai
chaḌhti hui har saans nahin aḳhiri hoti
ab bas bhi karo pyaar badan TuuT raha hai
kanTon ki zamin sang ki barish men yuun ‘kashif’
chalna hua dushvar badan TuuT raha hai
Leave a Reply