Ishq Ko Bar-E-Zindagi Na Kaho

ishq ko bār-e-zindagī na kaho

baat itnī bhī be-tukī na kaho

dil ko jis meñ ho fikr-e-sūd-o-ziyāñ

us tijārat ko āshiqī na kaho

kuchh to marne kā hausla dikhlāo

sirf jiine ko zindagī na kaho

dil-lagī ke sivā bhī kuchh hai ishq

ishq ko mahz dil-lagī na kaho

kuchh na kah kar bhī apne dil kī baat

yuuñ ba-andāz-e-ḳhāmushī na kaho

sab kaho par hameñ ḳhudā ke liye

apne mahfil meñ ajnabī na kaho

jis ko kuchh aadmī kā dard na ho

aise zālim ko aadmī na kaho

dil ko baḳhshe jo zindagī ‘manshā’

tum to us ġham ko ġham kabhī na kaho

Leave a Comment