Poet
ik qurb jo qurbat ko rasa.i nahin deta
ik fasla ehsas-e-juda.i nahin deta
ik tirgi deti hai basarat ke qarine
ik raushni vo jis men sujha.i nahin deta
ik qaid hai azadi-e-afkar bhi goya
ik daam jo uḌne se riha.i nahin deta
ik ah-e-ḳhata girya-ba-lab sub.h-e-azal se
ik dar hai jo tauba ko rasa.i nahin deta
ik shauq baḌa.i ka agar had se guzar jaa.e
phir ”main” ke siva kuchh bhi dikha.i nahin deta
mat puchhiye chalakiyan meri ki mira aib
ab ahl-e-nazar ko bhi dikha.i nahin deta
Leave a Reply