abdul-salam

Dil Ki Haalat Bayan Nahin Hoti

dil ki halat bayan nahin hoti

khamushi jab zaban nahin hoti

harf-e-hasrat hai tum ne kya samjha

zindagi dastan nahin hoti

kya muqabil ho husn-e-janan ke

chandni be-karan nahin hoti

tum jo aao to ho javan mahfil

varna kab kahkashan nahin hoti

husn ki be-rukhi ada thahri

ashiqi bad-guman nahin hoti

be-qarari ki bas dava tum ho

ye tabibon ke haan nahin hoti

jo ye hindostan nahin hota

to ye urdu zaban nahin hoti

kuchh marasim ‘salam’ rahne de

dushmani javedan nahin hoti

More Poems

Leave a Comment