gulon par saaf dhoka ho gaya rangin kaTori ka
rag-e-gul men jo aalam tha tiri angiya ki Dori ka
barabar ek se misre nazar aate hain abru ke
tavarud kahiye ya hai ek men mazmun chori ka
bahut gham khate khate ik-na-ik din jaan ja.egi
zarar rakhta hai ai dilbar natija ser-ḳhori ka
hua hai ham ko ik mutrib pisar ki zulf ka sauda
hamara shor-e-vahshat bhi ye ik paTTa hai shori ka
ḳhafa ho galiyan do chaho aane do na aane do
main bose lunga sote men mujhe lapka hai chori ka
agar tum bosa-e-seb-e-zaqan se ho ga.e qatil
gale par pher diije mere chaqu meva-ḳhori ka
koi shaida-e-ariz hai koi zulfon ka divana
kisi ko ishq kaali ka koi ashiq hai gori ka
kahin ho achchhi surat dekh luun didar nazron se
miri ankhon ko choron ki tarah lapka hai chori ka
misi-alud lab chuse jo us ke balbe shirini
maza aaya mire munh men siyah ponDe ki puuri ka
shab-e-gham men fughan karta huun jab tham jaate hain aansu
tamasha dekho tifl-e-ashk bhi ḳhugar hai lori ka
na bandho sher men duzd-e-hina ka ai ‘qalaq’ mazmun
kahega yaar shoḳhi se ye hai mazmun chori ka
Leave a Reply