baith jaata hai vo jab mahfil men aa ke samne
main hi bas hota huun us ki is ada ke samne
tez thi itni ki saara shahr suuna kar gai
der tak baitha raha main us hava ke samne
raat ik ujde makan par ja ke jab avaz di
guunj utthe bam-o-dar meri sada ke samne
vo rangila haath mere dil pe aur us ki mahak
sham-e-dil bujh si gai rang-e-hina ke samne
main to us ko dekhte hi jaise patthar ho gaya
baat tak munh se na nikli bevafa ke samne
yaad bhi hain ai ‘munir’ us shaam ki tanhaiyan
ek maidan ik darakht aur tu khuda ke samne
Leave a Reply