Saima Esma
koi imkan to na tha us ka magar chahta tha
kab se koi kisi divar men dar chahta tha
zabt ke peḌ ne gul aur khila.e ab ke
aur hi tarz ka ye dil to samar chahta tha
aḳhiri manzil-e-taskin-e-dil-o-jan talak
manzilen raah na kaTen ye safar chahta tha
chand lamhon ke liye jaḌ ko vo sairab kare
aur shitabi se nikal aa.e samar chahta tha
kitna kam-fahm tha koi ki jala kar un ko
zindagi par mire ḳhvabon ka asar chahta tha
ye alag baat ki teshe se shanasa.i na thi
varna jaan koi tujh pe magar chahta tha
hijr ehsas ko shal bhi to kiye rahta hai
asar us ka koi ba-rang-e-digar chahta tha
us ko sayon ke ta.aqub men likha tha rahna
dard angan men ghana ek shajar chahta tha
ek gahri si nazar rauzan-e-dil ke andar
dasht-e-ehsas kahan shams o qamar chahta tha
andhiyan dosh pe le kar vo uḌa phirta ho
aur salamat bhi rahe kanch-nagar chahta tha
Leave a Reply