ka.i dinon se muravvat nahin hui mujh se
use bhi koi shikayat nahin hui mujh se
bahut se kaam dikhave ke kar raha tha main
ḳhuda ka shukr ibadat nahin hui mujh se
na.e sire se mohabbat ki aarzu thi magar
na.e sire se mohabbat nahin hui mujh se
ye log apne aqide se pyaar karte hain
isi liye to aqidat nahin hui mujh se
main zimmedar huun teri udaas ankhon ka
main manta huun hifazat nahin hui mujh se
tamam raat yunhi tiliyan jalata raha
diya jalane ki himmat nahin hui mujh se
ye aur baat tujhe darguzar kiya varna
kisi ke saath ri.ayat nahin hui mujh se
Leave a Reply