Qamar Jalalvi
sajde tire kahne se main kar luun bhi to kya ho
tu ai but-e-kafir na ḳhuda hai na ḳhuda ho
ghunche ke chaTakne pe na gulshan men ḳhafa ho
mumkin hai kisi TuuTe hue dil ki sada ho
kha us ki qasam jo na tujhe dekh chuka ho
tere to farishton se bhi va.ada na vafa ho
insan kisi fitrat pe to qaa.em ho kam-az-kam
achchha ho to achchha ho bura ho to bura ho
is hashr men kuchh daad na fariyad kisi ki
jo hashr ki zalim tire kuche se uTha ho
itra ke ye raftar-e-javani nahin achchhi
chaal aisi chala karte hain jaisi ki hava ho
mai-ḳhane men jab ham se faqiron ko na puchha
ye kahte hue chal diye saaqi ka bhala ho
allah-re o dushman-e-iz.har-e-mohabbat
vo dard diya hai jo kisi se na dava ho
tanha vo miri qabr pe hain chak-gareban
jaise kisi sahra men koi phuul khila ho
mansur se kahti hai yahi dar-e-mohabbat
us ki ye saza hai jo gunahgar-e-vafa ho
jab lutf ho allah sitam valon se puchhe
tu yaas ki nazron se mujhe dekh raha ho
farmate hain vo sun ke shab-e-gham ki shikayat
kis ne ye kaha tha ki ‘qamar’ tum hamen chaho
Leave a Reply