Ada Jafarey
ye hukm hai tiri rahon men dusra na mile
shamim-e-jan tujhe pairahan-e-saba na mile
bujhi hui hain nigahen ghubar hai ki dhuan
vo rasta hai ki apna bhi naqsh-e-pa na mile
jamal-e-shab mire khvabon ki raushni tak hai
khuda-na-karda charaghon ki lau badha na mile
qadam qadam miri viraniyon ke rang-mahal
dilon ko zakhm ki saughat-e-khusravana mile
tum is dayar men insan ko dhundhti ho jahan
vafa mile to ba-ehsas-e-mujrimana mile
gae dinon ke havale se tum ko pahchana
ham aaj khud se mile aur valihana mile
kidhar se sang chala tha ‘ada’ kahan pahuncha
jo ek thes se tuten unhen baha na mile
Leave a Reply