Junaid Akhtar
koi mohlik si bimari hui hai
mohabbat aankh se jaari hui hai
teri riqqat ki shiddat se hai zahir
ye mere naam par taari hui hai
saza hai ye ma.ashi hijraton ki
bahut masruf bekari hui hai
kabhi qismat ko bechari na kahna
ki ye taqdir ki maari hui hai
zaban chalti nahin hai is tarah se
ye aari kaaT se aari hui hai
vo aise ḳhvab the sote hue bhi
miri fard-e-amal bhari hui hai
yaqin ḳhud uTh gaya hai mujh se mera
miri itni taraf-dari hui hai
mujhe jab bolna aaya hai ‘aḳhtar’
tabhi lafzon ki dildari hui hai
Leave a Reply