zang-alud zaban tak pahunchi honTon ki miqraz
ḳhamoshi ki jhiil men Duubi pasmanda avaz
kaghaz par uljhate rahiye shabdon ki zanjir
aate aate aa ja.ega likhne ka andaz
haal ka matam karte karte ankhen ḳhushk huiin
mustaqbil ki soch raha hai maazi ka nabbaz
ḳhushiyon ki dhundli tasviren rone ki tamhid
ashkon ki kaali parchha.in hansne ka aghaz
aao suraj noch ke andhi ankhon men bhar len
kab tak aḳhir chaTi jaa.e tariki ki bayaz
Leave a Reply