Tu Meri Jaan Gar Nahin Aati

tū mirī jaan gar nahīñ aatī

ziist hotī nazar nahīñ aatī

dilrubā.ī o dilbarī tujh ko

go ki aatī hai par nahīñ aatī

hāl-e-dil misl-e-sham.a raushan hai

go mujhe baat kar nahīñ aatī

har dam aatī hai garche aah par aah

par koī kārgar nahīñ aatī

kyā kahūñ aah maiñ kisū ke huzūr

niiñd kis baat par nahīñ aatī

nahīñ ma.alūm dil pe kyā guzrī

in dinoñ kuchh ḳhabar nahīñ aatī

kiije nā-mehrbānī hī aa kar

mehrbānī agar nahīñ aatī

din kaTā jis tarah kaTā lekin

raat kaTtī nazar nahīñ aatī

zāhiran kuchh sivā.e mehr-o-vafā

baat tujh ko ‘asar’ nahīñ aatī

Leave a Comment