Iqrar Ka Matlab Ho Ki Inkar Ke Mani

iqrār kā matlab ho ki inkār ke ma.anī

koī to ho samjhe mirī guftār ke ma.anī

us jaisā koī ho to kahe us kī misāleñ

ho yaar sā koī to kare yaar ke ma.anī

ye jism dil-o-jāñ to haiñ bin māñge hī tere

phir kyā haiñ tire dast-e-talabgār ke ma.anī

ik vo ki uThātā gayā buniyād barābar

ik maiñ ki samajhtā gayā dīvār ke ma.anī

bachpan hai javānī hai buḌhāpā hai ye kyā hai

marnā hī agar hai to phir advār ke ma.anī

phūloñ ko phaloñ ko sar-e-afkār sajāyā

ya.anī ki kiye yuuñ lab-o-ruḳhsār ke ma.anī

jaatā hai to jaate hue dil ko bhī jalā jā

jab tū hī na Thahregā to ghar-bār ke ma.anī

har chiiz yahāñ apne lavāzim kī hai muhtāj

sāhab hī na Thahroge to dastār ke ma.anī

ai kaash ki jis ke liye kahtā huuñ maiñ ‘tāhir’

vo mujh ko batā.e mire ash.ār ke ma.anī

Leave a Comment