jab saaz ki lai badal gai thi
vo raqs ki kaun si ghadi thi
ab yaad nahin ki zindagi men
main akhiri baar kab hansi thi
jab kuchh bhi na tha yahan pe ma-qabl
duniya kis chiiz se bani thi
mutthi men to rang the hazaron
bas haath se ret bah rahi thi
hai aks to aaina kahan hai
tamsil ye kis jahan ki thi
ham kis ki zaban bolte hain
gar zehn men baat dusri thi
tanha hai agar azal se insan
ye bazm-e-kalam kyuun saji thi
tha aag hi gar mira muqaddar
kyuun khaak men phir shifa rakhi thi
kyuun mod badal gai kahani
pahle se agar likhi hui thi