phuul sunghe jaane kya yaad aa gaya
dil ajab andaz se lahra gaya
us se puchhe koi chahat ke maze
jis ne chaha aur jo chaha gaya
ek lamha ban ke aish-e-javedan
meri saari zindagi par chha gaya
ghuncha-e-dil haae kaisa ghuncha tha
jo khila aur khilte hi murjha gaya
ro raha huun mausam-e-gul dekh kar
main samajhta tha mujhe sabr aa gaya
ye hava ye barg-e-gul ka ehtizaz
aaj main raz-e-musarrat pa gaya
‘aḳhtar’ ab barsat ruḳhsat ho gai
ab hamara raat ka rona gaya