Bahut Qarib Ho Tum

Ali Sardar Jafri

bahut qarib ho tum phir bhi mujh se kitni duur

ki dil kahin hai nazar hai kahin kahin tum ho

vo jis ko pi na saki meri shola-ashami

vo kuza-e-shakar o jam-e-ambagin tum ho

mire mizaj men ashuftagi saba ki hai

mili kali ki ada gul ki tamkanat tum ko

saba ki god men phir bhi saba se begana

tamam husn o haqiqat tamam afsana

vafa bhi jis pe hai nazan vo bevafa tum ho

jo kho gai hai mire dil ki vo sada tum ho

bahut qarib ho tum phir bhi mujh se kitni duur

hijab-e-jism abhi hai hijab-e-ruh abhi

abhi to manzil-e-sad-mehr-o-mah baaqi hai

hijab-e-fasla-ha-e-nigah baaqi hai

visal-e-yar abhi tak hai aarzu ka fareb