Alamtaab Tishna
safar men raah ke ashob se na Dar jaana
paḌe jo aag ka dariya to paar kar jaana
ye ik ishara hai afat-e-na-gahani ka
kisi maqam se chiḌiyon ka kuuch kar jaana
ye intiqam hai dasht-e-bala se badal ka
samundaron pe baraste hue guzar jaana
tumhara qurb bhi duuri ka isti.ara hai
ki jaise chand ka talab men utar jaana
tulu-e-mahr-e-daraḳhshan ki ik alamat hai
uTha.e sham-e-yaqin us ka daar par jaana
the razm-gah-e-mohabbat ke bhi ajab andaz
usi ne vaar kiya jis ne be-sipar jaana
har ik nafas pe guzarta hai ye guman jaise
charagh le ke havaon se jang par jaana
ham apne ishq ki ab aur kya shahadat den
hamen hamare raqibon ne mo’tabar jaana
mire yaqin ko baḌa bad-guman kar ke gaya
dua-e-nim-shabi tera be-asar jaana
har ek shaḳh ko pahna gaya numu ka libas
safir-e-mausam-e-gul ka shajar shajar jaana
zamana biit gaya tark-e-ishq ko ’tishna’
magar gaya na hamara idhar udhar jaana
Leave a Reply