kyunkar ye tuf-e-ashk se mizhgan men lagi aag
shabnam se kahin bhi hai niyastan men lagi aag
na us se dhuan nikle hai na shoala uthe hai
ye turfa hamare dil-e-nalan men lagi aag
atish jo hamare tan-e-pur-dagh ki bhadki
daman se bujhai to gareban men lagi aag
ghar tu ne raqibon ka na ai aah jalaya
phir kya jo mire kulba-e-ihzan men lagi aag
shakhen shajar-e-bid se aahu ne ragad kar
vo shoala nikala ki bayaban men lagi aag
tasir tiri dekh li ai ah-e-sharar-bar
ik din na kabhi gumbad-e-gardan men lagi aag
allah-re garmi-e-mai angur ki ‘ghafil’
ik jaam ko piite hi dil-o-jan men lagi aag
Leave a Reply