Rais Amrohvi
ai dil sharik-e-ta.ifa-e-vajd-o-hal ho
pyare ye aib hai to ba-hadd-e-kamal ho
‘shibli’-o-‘bayazid’-o-‘gurunanak’-o-‘kabir’
hangama-e-jalal men raqs-e-jamal ho
sab ki zaban pe mast-kalandar ho dam-ba-dam
phir us ke ba.ad raat men DaT kar dhamal ho
phir ham-safar karen taraf-e-la-jehat
ne sharq-o-gharb ho na junub-o-shumal ho
asan ruju-e-shams hai lekin tire malang
pahunchen vahan jahan se palaTna muhal ho
ik ka.enat-e-ḳhvab ba-sad mumkinat-e-ḳhvab
nairangi-e-ḳhayal ba-husn-e-ḳhayal ho
sarshar-o-sarbuland-o-siyah-mast-o-sarfarosh
mahaul apne haal men gum ho vo haal ho
giita ka tazkira ho to gautam se guftugu
aur ved ki zaban men javab-o-saval ho
ai ḳhizr-e-vaqt majlis-e-aqtab-e-vaqt men
zikr-e-mo.amla ho na fikr-e-ma.al ho
ham yuun ravan hon rah-e-abad men ki sadd-e-rah
mustaqil-e-vajud na mazi-o-hal ho
kya kya tasavvurat hain kya kya taḳhaiyyulat
aisa na ho ki ye bhi tilism-e-ḳhayal ho
sab kuchh hai gar tilism-e-ḳhayal-o-fusun to phir
ai dil sharik-e-ta.ifa-e-vajd-o-hal ho
Leave a Reply