Sultan Akhtar
dar-ba-dar ki ḳhaak peshani pe mal kar aa.ega
ghum-phir kar rasta phir mere hi ghar aa.ega
samne ankhon ke phir yaḳh-basta manzar aa.ega
dhuup jam ja.egi angan men december aa.ega
shor kaisa apni aahaT bhi na sun paoge tum
is safar men aisa sannaTa to aksar aa.ega
jis ki ḳhatir shisha-e-avaz raushan hai bahut
us ki janib se bhi ḳhamoshi ka patthar aa.ega
sehn-e-dil men kab se tanha.i ke ḳheme nasb hain
ab na shayad mausam-e-hangama-parvar aa.ega
zindagi bhar ham isi ummid par chalte rahe
ab ke sahra paar kar len to samundar aa.ega
munhadim ho ja.egi ‘aḳhtar’ fasil-e-intishar
jab navah-e-jan men virani ka lashkar aa.ega
Leave a Reply