Kaifiyat Iztirab Ki Si Hai

kaifiyat iztirāb kī sī hai

tere ḳhat ke javāb kī sī hai

sub.h paḌhtā huuñ shaam paḌhtā huuñ

tū mukammal kitāb kī sī hai

sūra-e-shams hai nazar terī

sho.alagī āftāb kī sī hai

terī maujūdgī surūr-āgīñ

terī furqat azaab kī sī hai

merī āñkheñ haiñ titliyoñ kī tarah

terī sūrat gulāb kī sī hai

kyā karoge ‘asad’ ise le kar

jab ye duniyā habāb kī sī hai

Leave a Comment