Abdul Hamid Adam
saaqi sharab la ki tabiat udaas hai
mutrib rubab utha ki tabiat udaas hai
ruk ruk ke saaz chhed ki dil mutmain nahin
tham tham ke mai pila ki tabiat udaas hai
chubhti hai qalb o jaan men sitaron ki raushni
ai chand duub ja ki tabiat udaas hai
mujh se nazar na pher ki barham hai zindagi
mujh se nazar mila ki tabiat udaas hai
shayad tire labon ki chatak se ho ji bahal
ai dost muskura ki tabiat udaas hai
hai husn ka fusun bhi ilaj-e-fasurdagi
rukh se naqab utha ki tabiat udaas hai
main ne kabhi ye zid to nahin ki par aaj shab
ai mah-jabin na ja ki tabiat udaas hai
imshab gurez-o-ram ka nahin hai koi mahal
aghosh men dar aa ki tabiat udaas hai
kaifiyyat-e-sukut se badhta hai aur gham
qissa koi suna ki tabiat udaas hai
yunhi durust hogi tabiat tiri ‘adam’
kam-bakht bhuul ja ki tabiat udaas hai
tauba to kar chuka huun magar phir bhi ai ‘adam’
thoda sa zahr la ki tabiat udaas hai
Leave a Reply