Iqbal Sohail
kahan taqat ye ruusi ko kahan himmat ye german ko
ki dekhe chashm-e-kaj se bhi miri shaḳh-e-nasheman ko
vafa-dushman ye aalam ab to hai teri navazish se
ki rahm aane laga meri zabun-hali pe dushman ko
na ab sayyad ka khaTka na ab gulchin ka andesha
karam ne baghban ke phunk Daala mere gulshan ko
bhala in bijliyon ki sho.ala-samani ko kya kahiye
jinhon ne TukḌe TukḌe kar diya ho dasht-e-aiman ko
uTha.e hain ye fitne nargas-e-ghammaz ne varna
na but se shaiḳh ko zid hai na ka.abe se barahman ko
lagavaT ka ye fan bad-e-sahar ne mujh se sikha hai
gulon ko gudgudaya aur na lipTe ḳhaar daman ko
Leave a Reply