‘mir’-o-‘ghalib’ bane ‘yagana’ bane
aadmi ai ḳhuda ḳhuda na bane
maut ki dastaras men kab se hain
zindagi ka koi bahana bane
apna shayad yahi tha jurm ai dost
ba-vafa ban ke be-vafa na bane
ham pe ik e’tiraz ye bhi hai
be-nava ho ke be-nava na bane
ye bhi apna qusur kya kam hai
kisi qatil ke ham-nava na bane
kya gila sang-dil zamane ka
ashna hi jab ashna na bane
chhoḌ kar us gali ko ai ‘jalib’
ik haqiqat se ham fasana bane
Leave a Reply