Naeem Gilani
yuun bhi jab tak gham se mar nahin jaata main
raat ga.e tak lauT ke ghar nahin jaata main
dekhta rahta huun tujh ko us lamhe tak!
jab tak saara dard se bhar nahin jaata main
utni der sameTun saare dukh tere
jitni der ai dost bikhar nahin jaata main
tere gham ka bojh uTha.unga jab tak
koh-e-gham se paar utar nahin jaata main
maut se aage tak ke manzar dekhe hain
tanha.i se yunhi Dar nahin jaata main
‘na.im’ us se main apne saare dukh kahne
sochta to rahta huun par nahin jaata main
Leave a Reply