ek aisa azm-e-rasiḳh ab hamare dil men hai
gardish-e-ayyam bhi ḳhud in dinon mushkil men hai
apni ulfat par bahut kuchh tabsire hote rahe
azma.ish meri ḳhamoshi ki har mahfil men hai
rahrav-e-manzil na samjha aaj tak ye falsafa
karvan-e-zindagi ka har qadam manzil men hai
is ḳhushi ka ho bura majbur kitna kar diya
soch kar hi rah ga.e ham kaisi ḳhvahish dil men hai
teri meri kahne vaale soch lena ek baar
jhuuT khulne par tiri izzat kisi mahfil men hai
sa.eban to hai nahin koi bhi rah-e-ishq men
soch kar rah rah ke ye ahl-e-ḳhirad mushkil men hai
ham se ‘raje’ dushmanon ka bhi bura hota nahin
dosti ka paas itna to hamare dil men hai
Leave a Reply