ayadat hoti jaati hai ibadat hoti jaati hai
mere marne ki dekho sab ko aadat hoti jaati hai
nami si aankh men aur honT bhi bhige hue se hain
ye bhiga-pan hi dekho muskurahaT hoti jaati hai
tere qadmon ki aahaT ko hai dil ye DhunDhta har dam
har ik avaz pe ik thartharahaT hoti jaati hai
ye kaisi yaas hai rone ki bhi aur muskurane ki
ye kaisa dard hai ki jhunjhunahaT hoti jaati hai
kabhi to ḳhubsurat apni hi ankhon men aise the
kisi gham-ḳhana se goya mohabbat hoti jaati hai
ḳhud hi ko tez naḳhunon se haa.e nochte hain ab
hamen allah ḳhud se kaisi ulfat hoti jaati hai
Leave a Reply