Saqi-E-Khum-Khana Tha Jo Subh-O-Sham

saqi-e-khum-khana tha jo subh-o-sham

roz-e-adina tha masjid men imaam

jis ne chashm-e-mast-e-saqi dekh li

ta-qayamat us pe hushyari haram

is lab-e-jan-bakhsh ki baten thiin ya

moajazat-e-isi-e-gardun-maqam

ho gaya us ko qayamat ka yaqin

jis ne dekha sarv-qamat ka khiram

chashma-e-ab-e-baqa ki lahr thi

vo ibarat vo isharat la-kalam

marhaba itr-e-gareban ki shamim

hai moattar jis se ruhani masham

thi zaban ya qate-e-auham ya

zulfiqar-e-haidari thi be-niyam

jis ne dekha nargis-e-shahla ka khvab

is ne paaya ramz-e-qalbi la-yanam

qaala atmamto alaikum ne.mati

ho gaiin sab khubiyan us par tamam

jis ne chati utba-e-uliya ki khaak

talkhi-e-dauran se ho kyuun talkh-kam

ai saba sahra-e-jan men kar talash

kis taraf hain vo suradiq vo khiyam

khalvat-e-laila men tu guzre agar

to ye kah dena hamara bhi payam

tishnigan-e-shauq hain gum-karda-rah

tu bhi chal bahr-e-khuda do-char gaam

bahr men barpa hua josh-o-kharosh

habbaza rushhat-e-kasatil-kiram

saunp di thi dast-e-qudrat ne tujhe

naqa-e-laila-e-maani ki zamam

Leave a Comment