kisi naghme men hai vo aur na kisi saaz men hai
ras-bhari narm si lai jo tiri avaz men hai
gosh mushtaq ki ḳhud-saḳhta tafriq hai ye
varna jo saaz hai bahar hai vahi saaz men hai
le na Duube kahin ḳhush-fahmi-e-idrak tujhe
na-ḳhuda.i tiri poshida isi raaz men hai
aap hi zinda karen murda tamannaon ko
qum-be-izni ka asar aap ki avaz men hai
ham-safiron ki sadaon ka asar hai shayad
har giraftar-e-qafas koshish-e-parvaz men hai
kyuun karen ghair se ham arz niyaz-e-ulfat
jis ke talib hain abhi jalva-gah-e-naz men hai
‘arsh’ tak dekhiye pahunche ki na pahunche koi
aah ke saath dua bhi miri parvaz men hai
Leave a Reply