Asra Rizvi
udaas ankhen ghazal ankhen
javab ankhen saval ankhen
hazar raton ka bojh uThiye
vo bhigi palken vo laal ankhen
vo sub.h ka vaqt niind kachchi
ḳhumar se be-misal ankhen
bas ik jhalak ko taḌap rahi hain
rahin-e-shauq-e-visal ankhen
jhuki jhuki si mundi mundi si
amin-e-naz-e-jamal ankhen
vo hijr ke mausamon se uljhi
thaki thaki si niDhal ankhen
na jaane kyuun khoi khoi si hain
bujhi bujhi pur-ḳhayal ankhen
hain shoḳhiyon se chhalakne vaali
mohabbaton se nihal ankhen
agar nigahon se mil ga.iin to
karengi jiina muhal ankhen
chhupe hue hain hazar jazbe
bala ki hain ye kamal ankhen
Leave a Reply