daraz-qamat daraz-gesu ajiib sa ik nigar tha vo
gulon ki baag us ke haath men thi havaon par jab savar tha vo
junun tha ban kar lahu ragon men ki raat din dauḌte the lamhe
thake na the vo jo ruk ga.e the mire liye be-qarar tha vo
mire ḳhuda husn ke dafine ko mat ḳhazane ka martaba de
ki pa ke jo us ko ḳhush bahut tha ganva ke kal ashk-bar tha vo
ubal paḌe nafraton ke sote ki ho ga.i ḳhushk jhiil gham ki
shikast-ḳhurda sa munh chhupa.e na jaane kis ka shikar tha vo
kabhi kabhi jo suna gaya tha kahin kahin jo paḌha gaya tha
kitab men band ho chuka hai ik umr ka shahkar tha vo
vo doston dushmanon ka pyara phira tamam umr maara maara
suna hai kal gham ne maar Daala ki jis ka derina yaar tha vo
ajiib raahi tha reg-zaron men pyaas lamhon ki bo raha tha
magar chaTTanon se gir raha tha ki shab men ik abshar tha vo
Leave a Reply