subut-e-jurm na milne ka phir bahana kiya
ki adliya ne vahi faisla purana kiya
hava ke apne masa.il hain aur charagh ke bhi
na vo ghalat na amal us ne mujrimana kiya
ye tum ne jang ka unvan hi badal Daala
alam sajaya na lashkar koi ravana kiya
hari bhari thiin jo shaḳhen vahi phalin phulin
usi shajar ko parindon ne ashiyana kiya
saval main ne bhi rakkhe guzarishon ki tarah
badal ke us ne bhi andaz-e-dil-barana kiya
mire liye hi adavat ke dar bhi khole ga.e
mire hi naam mohabbat ka bhi ḳhazana kiya
hamesha va.ade hue taaj ke havale se
agarche taḳht ne va.ada kabhi vafa na kiya
Leave a Reply